https://x.com/wokurdistan/status/2035290629693980972?s=20

دۆستانی ئازیز،

خوشک و برایانی بەڕێز،

خۆم بە بەختەوەر دەزانم کە بۆ پیرۆزکردنی جەژنی نەتەوایەتی نەورۆز ئەمڕۆ لە
خزمەت ئیوە بەڕێزان دام.بۆ نەتەوەی کورد، نەورۆز تەنیا گۆڕانی وەرز و نوێبوونەوەی
سروشت نییە، بەڵکوو هێمایەکی دێرینی خۆڕاگری دژ بە داگیرکەرانی کوردستان، پێناسەی
نەتەوەیی و هەوێنی ڕزگارییە.

هەروەک دەزانن ، ئەمساڵ ڕۆژهەڵاتی کوردستان لە دۆخێکی یەکجار هەستیار و
چارەنووسسازدا پێشوازی لە نەورۆز دەکات، چونکە ناوچەکە کەوتووەتە ناو گێژاوی
ململانێ و شەڕێکی توندی نێوان ئێران، ئەمریکا و ئیسرائیل. بەمەش کوردستان بووەتە
چەقێ ستراتیژیی ئەم ململانییە، کە تێیدا زلهێزەکان دەیانەوێت دەسەڵاتی سەربازیی
ئێران لاواز بکەن و هاوکات چاویان لە ڕاپەڕینی نەتەوەکانی ئێران، بە تایبەتی
ڕۆژهەڵاتی کوردستانە.

لەم نێوەندەدا، ڕۆژهەڵاتی کوردستان کەوتووەتە نێوان بەرداشی سەرکوتی توندی
رژیمی ئیران و شەڕی هێزە جیهانییەکان. بەڵام سەرەڕای ئەم گوشارە تاقەتپڕووکێنانە و
لێکەوتە وێرانکەرەکانی شەڕ، ئیرادەی پۆڵایینی گەلەکەمان نەشکاوە؛ خەبات و بەرگریی
بۆ رزگاری ، بەتایبەتی لەسەر دەستی ژنانی چاونەترس، گەنجان و هەموو تویژەکانی
دیکەی کۆمەلگا بۆ پاراستنی زمان، کلتور و وەدەست هێنانی مافە ڕەواکانیان بە چڕی
بەردەوامە.

لەلایەکی ترەوە، بۆردوومانکردنی کەمپ و ناوەندەکانی کوردانی ڕۆژهەڵات لە
لایەن رژیمی ئیرانەوە لە باشووری کوردستان، ئەو ڕاستییە تاڵە دەسەلمێنێت کە
دەسەڵاتدارانی ئێران شەڕێکی ڕاستەوخۆ و ناڕەوا دژی کيان و ناسنامەی کورد دەکەن.
دیارە ئەم شەڕە تەنیا کێشەی ڕێژیم و دژبەرەکانی نییە، بەڵکوو هێرشی راستەو خۆیە
دژی بوونی هەموو کوردستان.

هەرچەندە میللەتەکەمان باجێکی قورسی داوە و دەێەدات، بەڵام داهاتووی گەش
تەنیا بە رزگاری و گەیشتن بە مافی نەتەوەییمان تێدەپەڕێت.

با بڵێسەی ئاگری نەورۆز، تاریکستانی ڕێگەمان ڕووناک بکاتەوە و ببێتە مایەی
یەکڕیزی و سەرکەوتنی یەکجاری.

نەورۆز پیرۆز

بژی کورد و کوردستان.

↑↓