کردنەوەی نووسینگەی ڕێکخراوی ژنان لە لۆزان

26 . بەفرانبار . 2725

ڕۆژی ١٦ی ژانوییەی ٢٠٢٦، بە بۆنەی کردنەوەی نووسینگەی ڕێکخراوی ژنان لە لۆزان، کە هاوکات بوو لەگەڵ یەکەمین ساڵوەگەریی دامەزراندنی ئەو ڕێکخراوەیە، ڕێوڕەسمێک لەلایەن ڕێکخراوی ژنانی کوردستانەوە بە بەشداریی ئەندامان و دۆستانی کورد و سویسی بەڕێوە چوو. سەرەتای ڕێوڕەسمەکە بە سروودی نەتەوەیی «ئەی ڕەقیب» و خولەکێک بێدەنگی بۆ گیانی پاکی شەهیدانی ئەم دواییانەی ڕۆژهەڵات و ڕۆژئاوای کوردستان و هەموو ئازادیخوازان دەستی پێ کرد.

پاشان خاتوو کەژاڵ حاجی عەبباسی، بەرپرسی ڕێکخراوی ژنان، وێڕای بەخێرهێنانی میوانان و سوپاسکردنی ئامادەبووان و هاوبەشی و پشتگیریی هەمووان، باسێکی لەسەر چۆنیەتیی بیرۆکەی دامەزراندنی ڕێکخراوێکی سەربەخۆی ژنانی کوردستانی، ئامانجەکانی ڕێکخراو و بەشێک لە کار و تێکۆشانی یەک ساڵی ڕابردوو پێشکەش کرد. بە بڕوای ناوبراو، شۆڕشی ژینا هۆکار بوو بۆ ڕەنگدانەوە، گفتوگۆ و ئاڵوگۆڕی بیروڕای ژنانی کوردستانی سەبارەت بەو کەموکورتییانەی کە بەهۆی نەبوونی ڕێکخراوێکی سەربەخۆی کوردستانییەوە هاتبوونە ئاراوە؛ کە سەرەڕای زەحمەت و تێکۆشانێکی زۆر، نەتوانرا وەڵامدەر بێت و شۆڕشەکە لە دەرەوە بە ناوی فارس و ئێرانییەوە ناسێندرا. ئەو ڕووداوە بوو بە هۆی ئەوەی کە چەند ژنێکی تێکۆشەر بە هەستکردن بە بەرپرسیارێتی، هەنگاوەکان خێراتر بکەن و بیر لە دامەزراندنی ڕێکخراوێک بکەنەوە.
بنەما و ئامانجەکانی ڕێکخراوی ژنانی کوردستان بریتین لە: بەهێزکردنی پەیوەندییە کۆمەڵایەتییەکان، پاراستن و پێشخستنی زمان و کولتووری کوردی، پشتیوانی لە ژنانی کورد و کەمینە ڕەگەزییەکان، پێشوازیکردن و ڕێنماییکردنی تازەهاتووان، دروستکردنی تۆڕ و بەهێزکردنی بەشداریی ژنان لە کۆمەلگای سویس، پتەوکردنی سەربەخۆیی و متمانەبەخۆبوونی ژنان و پاڵپشتیی بەهێزکردنی ئابووریی ژنان لە کوردستان.
ئێستا ڕێکخراوی ژنان کار لەسەر چەندین دۆسیەی داوای مافی پەنابەری، یەکگرتنەوەی خێزانی، توندوتیژیی خێزانی و خاوەن‌‌پێداویستیی تایبەت دەکات. ئەم کارانە بە هاوبەشی و ئامادەبوونی پارێزەران، یاساناسان، پزیشکان، پەرستاران، توێژەرانی کۆمەڵایەتی و هاوبەشانی دیکە ئەنجام دەدرێن.
ڕێکخراوی ژنان یەکەم نووسینگەی لە مانگی ژووئییەی ٢٠٢٥ لە شاری ژنێڤ کردەوە و دووەمین نووسینگەشی لە هەفتەی ڕابردووەوە لە شاری لۆزان دەستبەکار بووە.
بڕگەی کۆتایی مەراسیمەکە، کردنەوەی پێشانگایەکی کاری دەستی و هونەریی ژنانی رۆژهەڵاتی کوردستان بوو کە بە دەست و پەنجەی ڕەنگینی خۆیان ئامادەیان کردبوو. لە کۆتاییدا بەشدارانی کۆبوونەوەکە بە خواردنی کوردی میوانداری کران.